Biografia Clementino da Costa Hornai - Kongregasaun IEAD Betano

Terceiru Dirizente Kongregasaun IEAD Betano
Sr. Clementino Da Costa Hornai

Orientasaun

Nia nudar mane ida nebe'e forte, brani, pasensia, klibur nain no responsabilijador. Nia nudar ruin dolen familia nomos lideranca iha familia oan ami moris ba. Nia mak ema ida nebe'e ami bolu "hau Aman".

Aman nia naran kompletu: Clementino da Costa Hornai, moris iha Bermet, Bemetan loron 1 Janeiro 1959. Husi inan avo feto naran Heu-Quei husi jerasaun RinBesi_Makerek Aituha, Aman Avo mane naran Mau-Mali husi jerasaun Bolbete Bobonaro. Maun alin rasik Mario-Pereira nudar Agrikultur no Agalino -Pereira nudar forca FALINTIL, mate iha funu laran 1979 ho naran kodigu Tirilolo. 

Bermet - Bemetan - Betano 
Uma knua moris fatin

Depois Moris mai tinan ida Liu (1+) Inan susu Avo feto Heu-Quei hakotu iis no husik hela Aman Avo mane Mau-Mali ho Maun alin nain tolu Morris kiak. Avo mane Mau-Mali fai akar nudar feto hodi taumatan ba Sira nain tolu. Iha tempu néba Avo mane Mau-Mali diriji aman Clementino hodi ba eskola Portugis toó segundu klase. 

Uluk, aman foin sae, nia profisaun nudar Agrikultur. Maibe momentu funu 1975, aman nudar Forca FALINTIL Rezervada no hola parte iha servisu logistiku hodi fornece aihan.  Iha tinan 1979 rende iha vila ba Forca Indonesia Tamba feto ho labarik no problema baze de apoiu. 

Iha tempo tuir mai Avo Mau-Mali hola fali feto kik, Avo Hermina, nune aman sira hela fali ho primeiru familia Avo Joao - Eliza, segundu familia avo Isac-Amelia no terceiru familia avo Albertino - Albertina. Depois hela ho terceiru familia pai Clementino hases an hodi forma Uma kain ona ho Inan Antonina Miranda néebe mak sei iha relasaun familia ho primeiru Familia (Bolbete-Umferik).

Iha Tinan 1984 Loron 8 fulan Janeiro Familia Clementino no Antoniña hetan graca Maromak nian ho oan mane boot mak hanaran Daniel da Costa iha uma fatin Aidak-Sukaer Hun Kadalak Motaleto  Bemetan. Depois Oan mane bót ho tinan 1, pai Clementino hetan chamada nudar Pr. Carlos nia asistente ou ajudante hodi ajuda servi, haklaken Maromak Nia obra no hetan konsagrasaun husi pr Miguel Coias Ceabra Gomes iha Igreja Kongregasaun Betano  tinan 1985.

Iha Tinan 1986 Pr. Carlos ho Pra. Ana entrega responsabilidade tomak IEAD Betano ba Pai Clementino hodi kontinua Servicu nudar bibi Atan Igreja, Terceiru Dirizente Kongregasaun IEAD Betano. Alein halao servicu Igreja nian, pai Clementino Servicu hanesan Karpinteiru no Agrikultur hodi suporta programa servisu Igreja no nececidade familia. Relasiona familia ho profisaun nia bensaun, luhu lamamuk, ahi matan lamate, mahon atu saran loro, udan no satan anin fuik sira. Nune'e familia ida nee bele hetan tan bensaun Maromak nian ho jerasaun Mane nain 5, feto nain Ida no bei_oan nain hitu.

Fatin no Fasilidade Igreja nebe antes nee molok intrega ba aman Clementino; primeiru Uma Igreja Tali Ida Lidera husi Derijente Filomeno de Araujo (Nudar Fundador ida husi IEAD_Betano), Segundu Igreja setengah tembok lidera husi Pr. Carlos ho Pra. Ana ho medidas 12mx6m. Depois entrega tutan, tempu ba tempu medidas igreja refere hetok menus espasu ba bebeik no sarani balun tenser aziste partisipasaun kultu iha deit igreja sorin nomos palaka. Hateke ba futuru oin mai akompanna ho dezenvolvimentu presiza espacu igreja ida nebe'e suficiennte, konfortabel no favoravel. Bazeia ba razaun hirak ne'e mosu desizaun husi sarani sira hotu hodi konstrui igreja foun ida tan.

Iha aman pr Clementino nia tempu, konstrui tan terceira Igreja ho medidas interna 24mx9m no externa palaka 6mx2m. Igreja bele finaliza konstrusaun Tamba hetan Apoio husi sarani sira hotu husi IEAD Kaiseru, Betano, Ailuli, Atauro nomos fundus husi Governo RDTL iha setor Apoio Sociedade Civil SASCAS ou GAS ho montante etapa primeiru 45000$ no segundu 15000$. Orsamentu Hirak nee jere husi Isaura Oliveira Dias nudar tezoreira, kordenadora no ezekutadora.

Rezultadu servisu evanjelizasaun aman Clementino nian balun mak Ezistensia IEAD Kaiseru. Nebe'e hahu halao evanjellu husi familia ida ho naran Elijitu no Elizita. Fatin sira seluk nebe'e hola parte mos iha servisu evanjelizasaun aman  Clementino nian mak hanesan Feriksare, Besusu _ Kolkau, Belaluhu, Weberek, no fatin seluktan. 

Servicu evanjelizasaun hasoru obstaklu no dezafiu oioin hanesan situasaun politik Indonesia ho fretelin, meius transportasaun, diferencia ideolojia fiar iha Sociedade. Meius transportasaun mak lao ain, uza kuda bainhira tula naha no sasan barak, pois bicicleta, motor ho kareta nudar transportasaun publiku. Situasaun politika sei lapertubra basa'a hadomi nebe'e mai husi fiar hamosu esperansa boot hodi enkoraza, ate iha tinan 1999 mosu separasaun Provinsia Timor Timur husi nasaun Indonesia hodi hari'i nasaun rasik ohin loron ita hotu konnece nudar nasaun Timor Leste, momentu ne'e refujiu ba ailaran ho kristaun balun buka malu nafatin hamutuk hodi kontinua  servisu evanjelizasaun kultu adora Maromak. Solusiona diferencia ideolojia fiar iha Sociedade  ho dalan haktuir vontade Espirito Santo iha ita an nebe'e halao evanjelizasaun atu lases mos husi meius toleransia no kompromi, signifika laobriga ema atu tuir ita nia hakarak maibe Maromak Nia Vontade. 

 

Ohin loron tinan 40 ona, Aman Clementino Servicu  bodik chamada JESUS KRISTU nian ba ministeriu misaun EVANJELIZASAUN iha IEAD hodi kumpri evanjellu sao Markus 16:15-26 "Baa mondu tomak prega Hau nia Evanjellu, semak fiar no sarani (Arependementu) sei hetan salvasaun, maibe semak lafiar sei hetan kastigu" . Maromak lahili ou chamada ema nebe'e iha poder liu no matenek liu maibe Nai hili ida nebe'e lavale iha mondu hodi glorifika Maromak Naran, hanesan historia Josep bin Jakob, Moses, Josue, Gideon, Divid, Zerubabel, dicipulus Jesus nian no ezemplu historia seluktan. Bele hare'e statementu iha: 

1_Korintus  1:27-29 "Maibe buat nebe'e mondu hanoin beik, nemak Maromak hili hodi hateke ba sira nebe'e iha matenek, no buat nebe'e faraku ba mondu nia matan, nemak Maromak hili atu hateke ba sira nebe'e forte, atu ema labele loko-an iha Maromak nia preszenca".

Zakaria 4:6 "Laos tamba ita nia kbit no forca maibe Maromak nia Espiritu Santu".

Reorientasaun

Aman Clementino nudar mane ida nebe forte, brani, pasensia, klibur nain, domin nain no responsabilijador. Nia nudar ruin dolen familia, lideranca iha familia oan ami moris ba no mos Igreja.

Problema bele todan oinsa deit mak Mai hasoru familia ka Igreja, nia hanoin nee naruk no luan molok foti desizaun. Desizaun nebe foti sempre solusiona problema ho hadomi, laran maus no konstrutivu, laos hodi separa ou destroi. 

Sinais milagroju sira indika provas iha aman Clementino nia moris, liu husi servisu evanjelizasaun hanesan  haktuir ona iha evanjellu sao Markus16:17-18, konaba autoridade poder husi Espiritu Santu nian. 

Aman nudar mane ida nebé laran luak no domin nain iha familia, sempre fo motivasaun mai ami, entusiasmu hodi dedika, enkoraja, hospitalidade nomos supprta oan sira bele sai maduru, fiar an no independente. 

Tuka ba ne'e biografia badak kona ba CLEMENTINO DA COSTA HORNAI nudar pastor terceiru dirizente iha konregasaun IEAD Betano. Iha Sujestaun ka kritiku ruma atu hadiak liutan artikel ida nee bele fo ita boot sira nia komentariu. 

Obrigadu kmanek wain basuk.