Tanki Elektrisidade ~ Bateria “Battery” no kalkulasaun operasional ho lampu DC

Introdusaun

Molok tama ba'a definisaun bateria, ita sei hare lai ezemplu balun konaba fatin ense be'e iha uma. Fatin ense be'e ho eskalaun ki'ik hanesan jergen, balde, basia no seluk tan. Fatin ense be'e ho eskalaun bo'ot mak tanki. Tanki sempre uza hodi rai no rezerva be'e ne'ebe hetan temporariu, hodi uza fila fali bainhira presiza. Liafuan temporariu hanesan kantika ida hateten nune “udan monu rai prepara fatin ba ense, selae nia para o sei laaproveita no o sei esforsu an hodi hetan fila fali nia iha tempu ne'ebe o presiza”. Be'e ne'ebe ense ona iha tanki, atu hotu kleur k lalais depende fila fali ba'a volume tanki. Ho introdusaun ida ne'e espera bele refleta ita nia komprensaun kona ba saida mak BATERIA.

Bateria nudar fatin elektronika ida hodi rai no rezerva korente elektrisidade ho tipu DC “decelerator current”. Bateria, kapasitor kategoria hanesan tanki elektrisidade tamba bele rezerva korente elektrisidade . Korente elektrisidade sei rai iha Bateria no bele uza fila fali bainhira fontes elektrisiadade nian lafornese ona. Aplikasaun bateria hola parte iha area oioin komforme ema idaidak nia nesesidade. Balun uza hodi estarta makina, balun hodi transforma ba'a enerjia mekanika dinamika iha transporte hanesan kareta ou bisikleta ne'ebe uza Bateria, no balun uza hanesan enerjia rezerva “back up power” iha uma ba'a asesoris ou lampu.

Hanesan haktuir iha artikel liu ba'a konaba benefisiu elektrisidade katak nesesidade baziku umanu nian konaba enerjia elektrisidade mak lampu hodi fo naroman iha tempu kalan. Tamba ne'e mak kuandu ahi mate iha tempu kalan halo konsumidores elektrisidade senti triste ho nakukun ne'ebe pertubra sira nia atividade importante balun. Kestaun ida nemak objetivu hakerak artikel ne'e atu loke ita nia hanoin oinsa bele uza bateria hodi responde Ahi Mate Piska-piska.

Informasaun Teknika

Tipu bateria hare husi parte manutensaun, iha oin rua. Ida bateria uza elektrolitu presiza manutensaun no ida fali lauza elektrolitu livre manutensaun. Kapasidade bateria sukat ho parametru Ah “amper hour”, 120 Ah, 80 Ah no 40 Ah nst. Amper mak propriedade sasukat parametru korente elektrisidade. Voltajen bateria mos variedade balun 6 volt, 12 volt no 24 volt nst. Voltajen kompara ho enerjia potensial nebe proporsional ho altura ka a'as, nune mos voltajen baihira bo'ot enerjia mos bo'ot no voltajen ki'ik enerjia mos ki'ik. Presiza mantein efisiensia bateria 75% hodi salva bateria labele a'at lalais iha tempu badak no ho alternativu seluk bele uza battery low voltage protection relay hodi diskonekta korente momentu karga bateria tun liu husi 25%. Diferensia entre konekta bateria paralelu no serial ho idaidak nia natureza, bainhira bateria rua ka tolu ou liu husi ha'at ita liga/konekta paralelu hamutuk, nia voltajen hanesan maibe ninia Ah amenta. No bainhira ita konekta serial ninia voltajen amenta maibe ninia Ah nafatin.

Kalkulasaun

Se iha uma ita iha bateria 12 volt, 80 Ah, efisiensia 25% no lampu DC 4 ho kada kapasidade 4 watt, no oras operasaun hahu husi tuku 6 (ne'en) lokraik to tuku 6 (ne'en) dader, total kalan ida oras 12 signifika lampu ha'at ne'e bele fo naroman mai ita durante kalan tomak.

Ho dadus hirak iha leten ita bele uza lampu ha'at ne'e durante kalan tolu liu. Mai ita prova ho kalkulasaun:

Kapasidade lampu = 4 x 4 =16 watt

Lampu konsumu korente elektrisidade = 16 watt / 12 volt = 1.33 Amper

Kapasidade bateria = 80 x 25% = 20 Ah

Durasaun lampu ha'at ne'e bele fornese naroman ho kapasidade bateria= 20 Ah / 1.33 Amper = 15.03 Oras

Durasaun ba'a kalan = 15.03 Oras / 12 Oras = 1.25 Kalan

Rezultadu kalkulasaun prova dunik katak ita bele uza lampu ha'at durante oras 15.03, signifika lampu ha'at ne'e bele fo naroman mai ita liu husi kalan ida.

Orsamentu ba'a sasan hirak ne'e hanesan tui mai;

Alternativu solar sel ou karegador bateria "converter" nia folin $ 55 .00, Kontrolador Karga $ 25 .00,

Bateria $ 100.00, Lampu DC 4watt ida $ 5.00 hamutuk $ 20.00, fiu ki'ik metru ida $ 0.50 cent no metru sanulu hetan $ 5.00, saklar ou kontak $ 2.50 . Ho dadus iha leten hetan total orsamentu ($ 207.50)

Atensaun

Fo hanoin deit katak, informasaun ne'e limite deit ho konnesementu ba'a bateria no utiliza lampu DC. Konaba asesoris elektronika seluk ne'ebe uza korente elektrisidade AC ka Acumulator Current laos Air- Conditionin, normalmente sei uza tan komponente elektronika seluk, konserteza orsamentu mos amenta, no prosedimentu teknika nian, sei publika iha artikel seluk.

Lia Ikus

Artikel ne'e publika, relasiona ho lamentsaun problema elektrisidade lakan mate iha Manufahi no Bairo seluk iha suku Betano rasik ne'ebe mak sedauk asesu ba'a enerjia elektrisidade hanesan Trans Aimaten, Trans Pemuda Tani, Manmera, Fatuk Mean, Mauber Ulu.

Hare ba'a orsamentu difikulta itoan atu ema hotu bele hetan fasilidade hanesan ne'e, maibe se ita hakarak kombate problema elektrisidade ahi mate, presiza servisu integradu husi individual rasik, NGO, Kompannia, Ajensia seluk no Governo. Espera ho artikel ida ne'e bele ajuda fo solusaun ba'a problema ahi mate ne'ebe sempre akontese iha ita-rain espesialmente no enjeral ba'a ema hotu ne'ebe presiza.

Artikel seluk tan konaba elektrisidade, bele klik no hare'e iha Pajina Elektrisidade.